Iako ima 39 godina: Brazilac želi novi ugovor sa bivšim prvakom Evrope

Engleski Čelzi je 2021. godine osvojio Ligu prvaka dok je menadžer bio Tomas Tuhel (Thomas Tuchel). 

Bilo je to prije samo dvije sezone, a “Plavci” su u međuvremenu povukli previše loših poteza u prelaznim rokovima.Tako da kada se pogleda današnji sastav, igrači koji su bili na terenu kada je osvojena najvažnija titula u klupskom fudbalu, mogu se nabrojati na prste jedne ruke.

Jedan od tih igrača je Brazilac Tijago Silva (Thiago Silva), iskusni štoper koji ima 39 godina i koji je i danas kod menadžera Maurisija Poketina (Mauricio Pochetino) standardni član prve postave.

Iako je već godinama za fudbalera, Silva sebe još neko vrijeme vidi na najvišem nivou, pa britanski mediji prenose kako on želi da produži ugovor sa klubom.

Tijago Silva je u Čelzi stigao 2020. godine. Sa Čelzijem je osvojio Ligu prvaka, evropski Superkup i Svjetsko klupsko prvenstvo.

Silva je prije Čelzija nastupao za PSG, Milan, Fluminense, Dinamo iz Moskve, B tim Porta, Žuventude i Futebol.

Brazilac je ove sezone za tim iz Londona odigrao 13 utakmica i postigao je jedan gol.

Za reprezentaciju Brazila nastupio je na 113 mečeva i sedam puta se upisao u listu strijelaca.

Od reprezentacije se oprostio nakon Mundijala u Kataru prošle godine.