“Bila je stvarno lijepa”: Skladan brak pun ljubavi Eve i Lojzija TRAJE 63 GODINE

U dobru i zlu, u bolesti i zdravlju, tako ide priča Eve i Lojzija Bošnjak, koji su se prije 63 godine upoznali u vozu i, kažu, bila je to ljubav na prvi pogled.

Bila je stvarno lijepa, imam ja slike, bila je jako lijepa, čudili su se, ja kao seljak, ja sam iz najjedostavnije porodice, riječ po riječ, došlo je do kontakta, u vozu na povratku u Suboticu – opisuje susret Lojzije.

Rođeni u Subotici, nakon vjenčanja doselili su se u Bar, gdje su podizali sina Karla. Posljednjih godina žive u Staračkom domu u Nikšiću. Eva, nježna i krhka, izgubila je 90 odsto vida, a markantni Lojzije postepeno gubi sluh. No, ne mari, kažu, samo dok su zajedno.

– Živimo kako živimo, trudimo se da živimo kako možemo, malo gore, malo dole, ali uglavnom tu smo. Djed je imao jako puno neprijatnosti u životu, ali hvala Bogu je živ jer je jako dobar čovjek. Nije sebičan da misli samo na sebe, on je jako dobar -kaže Eva za svog supruga.

– Kažu da je život tada lijep kad je buran, ne može uvijek da bude mirno, mora nekad i neka čarka da bude, tu poneki put ja malo dignem glas, a sad ona se više gubi, ona je sa tim folklorom upropastila sebe, bila je jako dobar folklorista. Ja sam joj tada govorio “ne skači molim te, ne skači,” ali što kaže Talijan “tesaturo” tvrdoglavo, njoj je tada bilo dobro jer je bila mlada, ali bogami godine čine svoje, ja sa 100 godina mogu daleko bolje da hodam od nje – kaže Lojzije.

Svaki trenutak sa njegovom Evom vrijedan je truda i pričanja, ističe Lojzije, i iskreno dodaje da je ona uvijek bila ljepša od njega.

Ruku jedno drugom ne puštaju ni sada. ali, vremena su sve izazovnija, pa ih ne čudi, što mladi danas odugovlače sa brakom, pišu Vijesti.

– Danas je toliko buran život, da stvarno ljudi ne mogu da se snađu, ima ovoga, ima onoga, jer današnja mladež nije zadovoljna, koliko mi se čini, ali ne može bit zadovoljna kakva je situacija. Ja znam kad smo bili mladi mi smo išli na turneje, zabave, to je bio idealan život, a sada, šta ćete, vrijeme čini svoje, vrijeme razara…”

– Da imate razumijevanja jedno prema drugome, da shvate da svi smo mi ljudi – poručuje Eva. Lojzije savjetuje što više saglasnosti i ljubavi, poštovanja jedno prema drugome…